Home | Sitemap | Kontakt | Info

 
Sticheleien und Pfälzer Humor
 

D'Vorfahrt fer's Klassetreffe
Autor: Kurt Kupper (1992)  *

Das Vorg'spräch war rum, - die Vorfahrt begann
Morschens bei Zeit, damit de Daach ziemlich lang
Bei de Abfahrt esch unklar, wu fahrn mer na
Kurzes Geplänkel, mer fangen in St. Martin a

Dort hott die Grafenstube schun ämol zu
Uff Maikammer in de Ochse, do sinn mer im nu
D´Speisekart und Preise uff de Schtrooß schnell studiert
G´schlosse esch widder, hänerum werd´s probiert

De Wert im  Terminkalänner eifrich rumg´sucht
Des werd nix, do hä' mer schun ä Hochzich gebucht
Gucken doch in Kirrweiler beim Bruder mol nei
Vielleicht hot der an dem Daach noch was frei

Doch zuerscht gehts zum Waldhaus Wilhelm mol nuff
Optimistisch gestimmt, -   die hänn jetzert uff
Doch am Aushang, die Preise, - fascht werd´s uns schlecht
Die sinn nix fer uns, wären fer die Herxemer recht

Zur Buschmühle gehts jetzt weiter, des wäre der Clou
Beim Aussteiche merken mer, die hänn heit ach zu
Mein Gott Walter, -  isch sähn des schun kumme
Heit esch wirklich alles fer umme

S´esch zwölfe, mer hänn nix, sinn ganz deprimiert
Jetzt werd´s holt drunne in Kirrweiler probiert
De Schwane,- bürgerlich, des Haus hot ach Stil
Die Auswahl  recht ordentlich, die Preise zivil

Mer bestelle unser Esse, -  verroten noch nix
So machens die Teschtesser, verrot de Ferdi uns fix
Na der muss es wisse, der esch kompetent
Lokale der mehr als schunscht einer kennt

Nach dem Essen ist klar, das wird es wohl sein
Hier nehmen wir sicher das Mittagessen ein
Mer melden uns telefonisch, mer warten mol ab
Was de Daach noch so bringt, Richtung Dahn do hinab

Noch Saarbacherhammer durch de Pälzer Wald
So wie de Buss fahre sell, - beim Ausflug halt
Die Kurt mähnt hol mol die Landkart do raus
De Ferdi saacht brauchen mer nitt, do kenn ich mich aus

Ich benn jo schließlich noch nitt doof
Plötzlich ä paar Häuser, Hermersbercherhof
Die Schtrooß esch zu Ende, die Ferdi jetzt hält
Mer sinn ganz drowe, am Ende der Welt

Der Ferdi hot irchendwu Rodalben gelääse
In Wirklichkeit hot des Schild "Rodelbahn" g`häse
Doch endlich trudle mer am Saarbacherhammer ei
Schön wärs gewesen, doch die hänn nix frei

In Ludwigswinkel wäre noch ä Ausflugslokal
Doch dort war zu, langsam wird es ne Qual
Busenberg Weisensteiner-Hof esch jetzt fällig
Nix geht, doch die Wirtin esch uns gefällig
Schickt uns, mer hänn allmählich Bedenke
Nach Oberschlettenbach in die Bühlerhofschenke
Die Frau esch nett, doch am vierte Juni esch zu
Allmählich verliert sogar de Ferdi sei Ruh

Macht bei der jungi Wirtin jetzt änner druff
Er bleibt de Siecher, die macht fer uns uff
Do trinke mer Kaffee, die b´sorcht uns die Kuche
Speziell  grad fer uns, des duhn mer buche

Fer die Abschluss hä' mer als noch känn Saal
Mer müssen uff Berchzawere s´bleibt uns kää Wahl
Doch bei dänne Preise, bleibt das Auge nicht trocken
Do bleibt  stecken im Halse jeder Brocken

Gleiszelle des werd´s wohl endlich sei
In de Südpfalz-Terasse do esch noch ebbes frei
Doch des esch zu vornehm, do speist man zu leise
Do wird geflüstert, beim Trinke und speise

Dann lande´mer do, wu mer mit Fuffzich gewest
Hier in de Reebmeer-Insel, ehr kennen de Rest
Ä Klassetreffe esch herrlich, des esch uns nitt nei
Doch bei de Vorfahrt, benn ich nächschtmol widder debei

/ Impressum > http://www.suedpfalz-internetverlag.de/impressum.htm