Home | Sitemap | Kontakt | Info

Sticheleien und Pfälzer Humor
 

Vorgespräch zum Klassentreffen
Autor: Kurt Kupper (1992)  *

Zeh Johr sind rum, s´esch widder mol soweit
Mer hänn unser Klassetreffe heit
Seit am Neine sinn mer uff de Bää
Ich stelle fest, s´war mol widder schää

Jetzt so gemütlich zur späten Schtunn
Gucke mer uns jetzt mol unner uns so um
Eichentlich sinn mer all noch ganz frisch
Wie alt sinn mer jetzert eigentlich ?

Sticker  fuffzich schätzt mer allgemein
Des werd wohl ä bissel unnertriwe sein
Denn mer hänn uns alle sehr gut gehalte
Uff alle Fäll, -  g´höre mer noch nitt zu de Alte

Üwerhaupt sinn mer eine besondere Klasse
Die Buwe eine besonders gute und brave Rasse
Schließlich hänn mer änn Parrer aus uns hervorgebrocht
Wu esch Eier Ordensfrau ? Wer´n ehr Mädle jetzt g´frocht

Sogar änn zwätte Parrer wär fer uns noch dren gewest
Wäre de Reitgassel geblewe im Speyerer Nest
Doch aus dem St, Josefs-Heim, genannt das Konvikt
Hot sich Klein-Norbert bald widder verdrickt

Dort  wär´n die Buwe, des esch nitt geloche
Vum Lausbu, zum Parrer groß gezoche
Doch im Seppl´s-Kaschte, das muss mer wisse
Hot mer Tag und Nacht  bleiwe misse

Das fand Klein Norbert ziemlich wüscht
Hot Heim-Weh noch sei´m Rilze kriescht
Zum Parrer deet er sicher tauge
Doch Religion und Latein wollt er nitt pauke

Das ging ihm nicht in den Kopf hinein
Wollt liewer än richtiche Rilzemer Lausbu sein
Und ausserdem, des wäre doch schad
Müsst halten er sich an das Zölibat

Dürfte nie erfahren und nie wissen
Wie die Mädchen tun die Buben küssen
Der Gedanke machte ihn gar nicht froh
Nach einem Jahr war er widder do
Wurde Messdiener, war viel Johr debei
Konnte ohne Risiko halwer Parrer sei

Als Messdiener das sie hier gesagt
Haben wir Buwe eine schöne Zeit verbracht
Obwohl wir, und das ist nicht gelogen
Von Schwester Wiltrudis ständig Prügel bezogen

Damals gab es da kein Verbot
Wir bezogen Dresche wie das täglich Brot
Auch in der Schule wurde schwer druff gekloppt
D`alt  Lindemern benahm sich als wie gedoppt

Die Weiber konnte man kaum verdaue
Drum duhn mer heit de Weibsleit noch nitt traue
De Norbert schrie oft, oh Jedich oh Jedich
Noch dänne Erfahrunge, bleib ich liewer ledich

Doch nun zum Klassetreffe, des esch so  ä G´schicht
So vun allää trifft sich die Klasse wirklich nicht
Do muss geklärt sei, -  was mer will
Wie läuft´s ab und im welchen Stil

Zur Diskussion setzt mer sich zusamme
D´Plätz beim Seither Guscht duhn fascht nitt lange
D´Buwe un d´Mädle schää getrennt
Wie mer des vun de Schul her kennt

S'esch erschte März, mer frieren, sapperlott
Weil d´ Lisabeth s´heize widder vergesse hott
Mer hocken im Mantel un quatschen uns warm
Wie früher, im Keller, beim Fliescher-Alarm

S´werd immer lauter, mer kummt fascht ins Schwitze
In de Kopp steicht allmählich die innere Hitze
Quer durch´s Läwe geht die Diskussion
Nur vum Klassetreffe hört mer bis jetzt noch känn Ton

Do ergreift de Klasse-Kapo endlich das Wort
Ehr Leit, -  als so geht des wirklich nimmi fort
Denke mer mol draa, -  um was es heit geht
Ob mer vielleicht mol üwer´s Klassetreffe redde deet

Jetzt esch de Hühnerstall erscht richtich mobil
Selbstverständlich, dass mer do drüwer redde will
Ä ganzi Schtunn esch rumm, jetzt fange mer mol a
Was esch wichtich, -  mit was fange mer a

De Bernhard määnt, -  zunächscht de Termin
Das esch's  wenigschte, des kriesche mer locker hin
De Därrzappe Guscht hät am 4. Juni frei
Des hä' mer mol schunn, an dem Dach sell´s sei

Wie werd des Treffe am Besten gestaltet
Do rührt sich Hannelore, die die Akten verwaltet
Uff alle Fäll schää muss es sei, so wie die Treffe devor
Lautes Geschnatter, die hott recht de esch wohr

Bleiwe mer in Rilze oder fahre mer fort
Wa' mer fahren, an was fer än Ort
Fahre mer mit Ehegatte oder fahre mer allein
Ein Aufschrei, ich gaube ne Bombe schlägt ein

Jetzt sinn mer beim Thema, das Reizwort esch g´falle
Jetzt werd's noch lauter, jetzt schreien se alle
Die Fraue könne die Frooch üwerhaupt nitt fasse
Ja hänn mer dann Verräter in unserer Klasse ?

Des Klassetreffe esch jetzt zum dritte mol
Mer wissen üwerhaupt nitt was des soll
Es bleibt so wie es bisher war
Ohne Begleiterscheinunge,- des esch wohl klar

Doch so äfach esch die Sache nich
Do melden mutig ä paar Männer sich
Owens zum Abschluss wenigschtens, wie´s manchmal üblich
Das esch nix, ä Klassetreffe werd so nitt gemütlich

Lange Debatten, mol hin und mol her
Die Entscheidung, die ist widder mol  schwer
Do werd abgestimmt, und do kummt´s raus
D`Mehrheit siescht, die Gatten bleiwen widder zu Haus

Nochdäm die Kuh jetzt esch endlich vum Eis
Bleiwe mer in Rilze oder geh´n mer uff d´Reis ?
Do hört mer, - mer hätten schließlich ä Haufe Geld
D´Kassierin Thea, - hätt üwer Dausend gezählt

Schnell esch mer jetzt mit dem Vorschlag zur Hand
Mit´m Bus werd g´fahre, - durch´s Pfälzer Land
Do schtrahlen mer all, üwer s´ganze Gesicht
Wäsche änner Busfahrt fer umme,  do hännle mer nicht

Wu weerd's Medaach gässe, un wu zu Nacht ?
Wu gäbt´s Kaffee, was werd zwischenei  gemacht ?
Wie esch de Abschluss, und werd do gedanzt ?
Großes Durchänanner, -  im Bernhard langts

Er schpricht ä Machwort jetzt gäwen mol Ruh
Hören mol jetzert im Ferdi zu
De Ferdi verzählt wie des in Herxe so lääft
Hot Eiladunge un Proschpäkte mitgschlääft

Speisen in Nowelhotels bleiwen dort über Nacht
So Windbeitels-Ferz wer´n vun uns nitt gemacht
Das macht Probleme,  -  des checke mer glei
Schließlich hänn mer unsere Angetraute nitt debei

Die Fraue kreischen, des deet Eich so basse
Nur änner hott ännie abkrischt von unserer Klasse
Kää Wunner, noch de Danzschtunn machten ehr stets Bosse
Hänn Eich vun Ältere stets abschleppe losse

Mei Danzgränzels-Partnerin zog mich damals mächtig ann
Doch do  war  nix, außer achtefärzich Fenschtere vun de "Kann".
Änn Meter Abstand, um die Hannelore rum
Die Bannweile wurde mit der Zeit mir zu dumm

Vun däre fehlt mer, un do redd ich känn Stuss
Seit Fünfevärzich Johr noch de erschte  Kuss
Mer arme Buwe kriegten vun Eich kää Arme und kää Reiche
Mussten notgedrunge holt uff Jüngere ausweiche

Was macht mer bloß mit ännere junge Frää ?
Sei´s drum, alt werd se schließlich vun allää
Doch zurück zur Sache, was organisiere mer jetzt
Nitt wie in Herxe, das steht jetzt schunn fest

Die Debatte geht weiter, rüwer-nüwer, mol hi und mol her
So ä Fescht zu organisiere des esch holt recht schwer
Do ergreift der Bernhard mol widder das Wort
Ehr Leit  mit´m beschte Wille, - so geht´s nimmi fort
Im große und ganze lischt jetzt alles schunn fescht
Mer machen ä Vorfahrt und klären des Rescht

Wer meld sich freiwillig, wer nämmt sich Zeit
Der Ferdi, wie  än Pfadfinder,  allzeit bereit
Er stellt sei Auto, Benzin hott er drinn
Die Kasse wird g´schont ,- die Vorfahrt macht Sinn

Und schließlich wolle mer mit sechzig nitt leichtsinnig wärn
Wann´s nitt klappt hät´s aha die hänn nix mäh im Härn
De Bernhard de Rudi un de Kurt sinn debei
So ä Vorfahrt esch wichtich, die muss jetzt holt sei

Die Zeit esch verstreche, vier Schtunn sind jetzt rumm
D´Lisabeth guckt schun vorwurfsvoll stumm
De Guscht und ich müsse früh widder raus
Am beschte er machen die Sitzung jetzt aus

Des war deitlich, doch wie heißt es so schön
Wenn´s am schönsten ist,  muss man meist leider gehn
Schön wars und laut, mer hänn dischbediert und gelacht
Was so ä Klasse- Vorgspräch für Freude doch macht

(siehe auch "Vorfahrt fer's Klassetreffe")

/ Impressum > http://www.suedpfalz-internetverlag.de/impressum.htm